Këngëtarja Jehona Sopi ka treguar se ka të dashur. Ajo këtë e ka bërë të njohur në një intervistë dhënë gazetës “Shekulli” në Shqipëri. “Po, kam të dashur, tani janë bërë dy vjet që jemi bashkë, shpresoj që të zgjasë përjetësisht”, ka deklaruar Jehona duke iu përgjigjur pyetjes nëse për momentin ka pranë dikë të dashur. E kontaktuar nëpërmjet telefonit nga “Express”-i me qëllim për të mësuar diçka më shumë për këtë lidhje, Jehona nuk ka dashur të shpalosë asgjë më tepër. “E tëra rreth jetës sime private është ajo që kam thënë në atë intervistë”, ka thënë Jehona. Në intervistën dhënë gazetës “Shekulli”, e pyetur si do të reagonte po ta tradhtonte bashkëshorti, ajo është përgjigjur: “Nuk e kam përjetuar asnjëherë, është situatë e panjohur për mua, nuk e di se si do të kisha reaguar, shpresoj të mos e përjetoj kurrë”. Në anën tjetër, e pyetur nëse si një person publik do të pozonte nudo për ndonjë revistë, në shkëmbim të një shumë të madhe parash, Jehona është përgjigjur shkurt:” Jo, nuk do të pranoja”. Tutje, Sopi ka treguar se momentalisht është përqendruar në studimin e psikologjisë, pasi është në prag të përfundimit të studimeve. Ndërsa, duke folur për pamjen e saj, këngëtarja ka pohuar se po mundohet t’i japë përparësi përshtatshmërisë. “Mundohem t’i jap ngjyrë kreativitetit tim varësisht nga konditat që paraqiten, duke mos i ikur asnjëherë shijes sime personale”, është shprehur ajo. Jehona Sopi në një të ardhme të afërt pritet që të realizojë një këngë dhe videoklip të ri. Së fundi, këngëtarja Sopi me këngën “Bashkë a do të plakemi” ishte pjesëmarrëse në festivalin “Top Fest”, ku fitoi çmimin “Best female”. Këngëtarja Jehona Sopi njihet për hite të shumta, si: “Kriza”, “I fundit fat”, “Thuaje”, “Fustani i bardh”, “Përvjetori”, “Borxh më ke”, “Marramendja” dhe të tjera.