Celulari i fundit në serinë Communicator të Nokias prej tani e tutje është edhe më i adhuruari. Natyrisht, vetëm për një numër të caktuar të shfrytëzuesve të cilët për këtë variant me diamante janë të gatshëm të ndajnë një shumë të theksuar të parave.
Qysh kur i është paraqitur publikut, në muajin shkurt të vitit të kaluar, Nokia E90 tërheq vëmendjen e njerëzve të dashuruar në pajisjet smartphone. Kësaj here në ballafaqim me këtë top model të Nokias ka vendosur të merret edhe dizajnuesi austriak.
Studioja e Aloissonit paraqet versionin me diamant të Nokias E90, të dekoruar me 408 diamante të përpunuara në mënyrë të përsosur dhe disa shtojca aty-këtu prej 18-karatësh. Sa i përket anës teknike, pajisja ka mbajtur karakteristikat e saj bazike, formën mbyllëse, tërë tastierën, mundësitë e shumta multimediale dhe lidhjet e tjera.
Krejtësisht e pritur, versioni me diamant i Nokias E90 e ka çmimin e lartë prej hiç më pak se 52.000 euro.